Në prani të kryetarit të Komunës së Fushë-Kosovës, z.Burim Berisha, kryeparlamentarit të Kosovës, z.Kadri Veseli, dhe ministrit të Kulturës, z.Kujtim Gashi, është vënë gurthemeli i Muzeut Historik të Natyrës si i vetmi në Kosovë.
Gjatë kësaj ceremonisë kryetari Berisha tha se po e përurojmë një vepër kulturore mjaft të rëndësishme për komunën tonë dhe për gjithë Kosovën.
“Ka disa vite që ka filluar procesi për këtë projekt dhe më në fund sot po vendosim gurthemelin për ndërtimin e këtij objekti. Jemi të lumtur që ky projekt do të realizohet në komunën e Fushë-Kosovës, i cili do të shërbej si një qendër studimore për shkencëtarët e fushës si dhe do të kontribuoj në programet edukative për natyrën”, tha kryetari Berisha.
Edhe kryetari i Kuvendit, z.Kadri Veseli, në prononcimin e tij në mes tjerash tha se vetëm duke investuar më shumë në shkencë dhe arsim mund ta përmirësojmë cilësinë e burimeve tona njerëzore dhe të zhvillojmë ekonominë e vendit.
Ideja dhe hapat e parë për këtë projekt ishin dhënë që në kohën kur ministër i Ministrisë së Kulturës ishte z.Kujtim Shala, kurse tani pritet që punimet të fillojnë shumë shpejt dhe projekti të përfundoj në afatet e parapara kohore.
