Familjarë të cilët kanë humbur më të dashurit e tyre, kishin mësy sot Qendrën e Kulturës për të marrë pjesë në Akademinë Përkujtimore e cila u organizua nga Komuna e Fushë-Kosovës përkatësisht Drejtoria e Kulturës, Rinisë dhe Sportit.
Fjalën e rastit në këtë Akademi e paraqiti Nënkryetari i Komunës z. Fadil Krasniqi i cili pasi iu drejtua të pranishmëve ndër të tjera tha: “Ishte 26 dhe 27 Marsi i vitit, 1999 kur nga falanga serbe në Fushë- Kosovë dhe fshatrat përreth, filloi krimi më makabër dhe më mizor që njeh historia.
Dora e zezë e armikut shekullor nuk do ngopej me gjakun e bijve më të mirë të këtyre anëve. Ditët e muajit Mars dhe Prill të vitit 1999 ishin ditë të ftohta ndonëse kishim hy në një pranverë të trishtuar e të gjakosur. Ato ditë do të eliminohen fizikisht më të dashurit tanë që ne sot po i kujtojmë.
Eliminimi i tyre fizik bëhej para syve të familjarëve njerëzve më të dashur që i kishin pranë. Ata që Kosovën e kishin shndërruar në një kasaphane, sigurisht se nuk e kishin kuptuar ende se një ditë çdo gjëje i vjen fundi dhe e vërteta del në dritë sado thellë që është varrosur! Andaj, sa herë që mblidhemi mendja më thotë dhe zemra e ndien se jemi duke kryer një lloj obligimi që kemi për ta sepse ata na mundësuan që të marrim frymë lirshëm dhe këtë liri që tash e gëzojmë është rezultat i sakrificës sublime të tyre dhe të gjithë dëshmorëve të rënë në luftë për liri, demokraci dhe mëvetësi. Në këtë përvjetor pikëllimi, por me ndjenjë krenarie për të rënët e Komunës së Fushë-Kosovës, më lejoni që për të gjithë ata të jap vlerësimet më të larta për aktivitetin, solidaritetin, urtësinë dhe mençurinë që na e lanë pas, dhe për dallim nga ata të cilët mbollën farën e urrejtjes dhe dhunës, këta martirë të Komunës së Fushë-Kosovës mbollën farën e tolerancës dhe të dashurisë në mes njerëzve që ne sot po e kultivojmë.
Nëse këto virtyte të tyre do të jenë udhërrëfyes për ne, fëmijët tanë dhe gjeneratat e ardhshme të cilat do të mësojnë shumë nga veprat e tyre, atëherë ne obligohemi edhe më tepër për ta larë borxhin që emrat e tyre mos të lejojmë që t’i mbulojë pluhuri i historisë.
Respektimi i të kaluarës do të thotë që të punojmë për të ndërtuar të ardhmen e sigurt për fëmijët tanë”, tha në fund të fjalimit të tij z. Krasniqi.
Në emër të familjarëve të rënë më 26 dhe 27 Mars të vitit 1999, me një fjalë rasti u paraqit edhe e bija e martirit të Lirisë dr. Fatmir Krasniqi – Njomza Krasniqi, kurse nxënësit e Shkollës së Mesme “Hivzi Sulejmani” kishin përgatitë disa pika të zgjedhura artistike.
Në përmbyllje të Akademisë një delegacion i komunës vendosi kurorë lulesh në varrezat e martirëve të Fushë-Kosovës.
