Seanca solemne dhe programi festiv karakterizuan shënimin e kësaj date të rëndësishme për gjithë qytetarët e komunës së Fushë-Kosovës.
Në seancën solemne fjalë rasti kanë mbajtur shefat e grupeve parlamentare të përfaqësuara në Kuvend si dhe prof. Jusuf Osmani laureat i titullit Qytetar Nderi i vitit 2012.
Në përkujdesje të Drejtorisë për Kulturë Rini dhe Sport programi i mëtutjeshëm i aktiviteteve u karakterizua me ndarjen e çmimit “Qytetar nderi për vitin 2013”, i propozuar nga kryetari i Komunës Burim Berisha dhe i aprovuar nga delegatët e Kuvendit me datë 10.06.2013, ky epitet i takoi Efendi Mulla Naim Tërnavës.
Titullin ia dorëzoi prof.dr. Jusuf Osmani, i cili e përgëzoi myftiun Tërnava për këtë çmim.
Më pas u dorëzuan edhe disa kupa dhe medalje për turnirin e 12 Qershorit që u mbajt me datë 11 qershor ku fitues ishte ekipi Berishët nga fshati Grabovc. Kupat dhe medaljet u dorëzuan nga Fadil Krasniqi nënkryetar i Komunës dhe Nurije Avdiu drejtoreshë për Kulturë Rini dhe Sport.
Program kulturo-argëtues u shfaq me prezantimin e të tri grupeve të Ansamblit të Këngëve dhe Valleve “Zëri i Kosovës” si dhe me këngëtarët Shqiponja Muhagjeri, Bekim Krasniqi e Rrustem Orllati.
Me të përfunduar ky program në sallën e leximit u bë promovimi i dy monografive: Kalaja e Harilaqit dhe Lashtësia e Fushë-Kosovës.
