Kryesuesi i Kuvendit të Komunës, z.Jakup Ternava, pasi informoi të pranishmit për Rendin e Ditës së seancës, mori edhe votimin unanim të këshilltarëve për të vazhduar me diskutimet për të gjitha pikat e rendit të ditës.
Fillimisht disa nga këshilltarët shtruan pyetje për ekzekutivin, me theks të veçantë rreth shërbimeve në shëndetësi dhe problemet që preokupojnë QKMF “Fatmir Krasniqi”, pastaj pyetje kishte edhe për Shërbimet Publike, Arsimimin etj.
Pika e rendit të ditës për pyetje u përmbyll me premtimin se delegatët do t’i marrin përgjigjet me shkrim në seancën e radhës.
Një nga pikat e rendit të ditës ishte edhe propozimi i Drejtorisë për Buxhet dhe Financa për rritjen e të hyrave vetanake dhe kjo vjen sipas drejtorit Ramadan Jashanica si rezultat i vazhdimit të sukseseve gjatë këtij viti fiskal andaj propozoj që të lejohet rritja e të hyrave vetanake edhe për këta dy muaj e gjysmë pasi që Ekzekutivi i Komunës ka përmbushë planifikimin e të hyrave në shumë prej 1,300,000,00 €. Tani janë planifikuar që deri në fund të këtij viti të realizohen edhe të hyra në shumën prej 315,000.00 € andaj edhe u kërkua që të lejohen linja të reja buxhetore për të përmbushur disa nga projektet, siç janë: Bashkëfinancim në projekte, Subvencione dhe transfere, Paga dhe meditje, Mallra dhe shërbime, Komunali etj. Delegatët e Kuvendit me disa kërkesa për të rritur shumat e investimeve në shëndetësi dhe arsim, aprovuan edhe këtë pikë të rendit të ditës.
Edhe pikat e tjera, nga gjithsej tetë sa ishin, u aprovuan me disa nga vërejtjet dhe kërkesat nga këshilltarët e Kuvendit.
Në fund të seancës kryesuesi z.Jakup Tërnava i uroi të gjithë kuvendarët dhe qytetarët e komunës së Fushë-Kosovës për festën e Kurban Bajramit.
