Qendra Kryesore e Mjekësisë Familjare “Dr. Fatmir Krasniqi” – Komuna e Fushë-Kosovës – është njëra prej 12 komunave të Kosovës të cilat janë përfshirë në kuadër të Projektit AQH (Shërbime shëndetësore të qasshme dhe kualitative).
Përveç aktiviteteve tjera, qendra jonë është duke pilotuar projektin ‘Kujdesi i integruar për pacientët me diabet tip 2 të moshës mbi 65 vjeç. Ky është projekti i parë i këtij lloji në Kosovë.
Kujdesi i integruar përmes ndërlidhjes së sektorit shëndetësor dhe sektorëve tjerë, e sidomos me sektorin social, këtyre pacientëve iu ofron shërbime shëndetësore me qëllim të ngritjes së statusit funksional, minimizimit të simptomave, komplikimeve si dhe shërbime të ndryshme sociale, ku pacienti është pjesë aktive e tërë procesit.
Lidhur me këtë projekt, në revistën shkencore “The Central European Journal of Medicine”, është publikuar artikulli shkencor “Pilot study of an integrated care model using the geriatric assessment tool”, nga bashkautorët Ariana Bytyqi, Genc Ymerhalili, Thomas Ernst Dorner, Viktoria Stein dhe Osman Maxhera.
Artikulli prezanton procesin e dizajnimit, implementimit dhe disa rezultate të këtij projekti.
