Kryetari i Komunës së Fushë-Kosovës, Burim Berisha, me bashkëpunëtorë priti në një takim përfaqësues të lartë të UNKT-së, me të cilët diskutoi për ndërtimin e një të ardhme më të mirë për qytetarët e Fushë-Kosovës, ku për qëllim ka pjesëmarrjen, mbrojtjen dhe partneritetin shumetnik për përmirësimin e arsimit, shëndetësisë dhe jetesës së qëndrueshme.
Delegacioni përbëhej nga:
Steliana Nedera, zv. drejtoreshë e UNDP-së, Laila Omar Gad, Kryesuese e zyrës së UNICEF-it në Kosovë, Skender Syla, Kryesues i zyrës së OBSH-së në Kosove, Blerim Azizi, Përfaqësues i Vullnetarëve te UN-it në Kosovë, Nora Sahatçiu, Eksperte e OKB-së për Koordinim.
Projekti është hartuar në konsultim të përbashkët dhe do të zgjasë shtatë muaj ndërsa synimet e projektit janë :
– Rritja e barazisë së mundësive të jetesës për komunitetet e veçuara në Fushë-Kosovë.
– Fuqizimi i familjeve të veçuara nga sistemi i qeverisjes pjesëmarrëse në Fushë-Kosovë në përmirësim të cilësisë së jetës së tyre
– Pjesëmarrja dhe bashkëpunimi i grupeve etnike në Fushë-Kosovë për siguri të ndërsjellë dhe mirëqenie socio-ekonomike.
UNKT dhe Komuna e Fushë-Kosovës nxitin partneritetin me agjencitë lokale dhe ndërkombëtare, si strategji kryesore për baraspeshimin e rezultateve të projektit, duke u afruar me faktorët si KE, USAID, donatorët bilateral dhe agjencitë tjera të OKB-së. Bashkërendimi mundësohet me projektet në vazhdim në zonë, duke përfshirë ato që përkrahen nga USAID, OSBE-ja dhe Komisioni Evropian, bashkë me OJQ-të e përfshira në proces.
