Drejtoria për Kulturë, Rini dhe Sport në Komunën e Fushë-Kosovës u bën thirrje të gjitha klubeve sportive të regjistruara dhe individëve që veprimtarinë e tyre e zhvillojnë në territorin e Komunës së Fushë-Kosovës, të aplikojnë për mbështetje financiare në kuadër të kësaj Thirrjeje Publike.
Mbështetja financiare dedikohet për financimin e projekteve dhe aktiviteteve sportive, të cilat u përgjigjen fushës prioritare dhe kryesore të kësaj thirrjeje: organizimit të turneve të ndryshme sportive. Klubet dhe individët mund të aplikojnë me projekt-propozime që do të kontribuojnë në avancimin, fuqizimin dhe masivizimin e sportit.
Të dhënat kryesore të Thirrjes Publike:
- Shuma e mbështetjes: Shuma minimale e mbështetjes financiare që mund të alokohet për çdo projekt nga OJQ-të është 500.00 €, ndërsa shuma maksimale është 8,000.00 €. (Mbështetja ofrohet nga fondi i përgjithshëm prej 400,000.00 € i planifikuar për Thirrjet Publike të vitit 2026).
- Kushti i aplikimit: Mund të aplikohet vetëm me një (1) projekt dhe periudha e zbatimit duhet të jetë minimumi një (1) muaj dhe maksimumi gjashtë (6) muaj.
- Afati i aplikimit: Thirrja hapet më datë 24.06.2026 dhe përfundon më datë 02.07.2026.
Mënyra e dorëzimit: Propozimet duhet të dorëzohen vetëm në formularët e paraparë sipas Udhëzuesit për Aplikim. Të gjitha dokumentet duhet të përgatiten në dy kopje fizike (origjinale) dhe një kopje elektronike (në CD) të vendosura në një zarf të mbyllur. Aplikacionet mund të dorëzohen drejtpërdrejt në Zyrën e Pritjes, ose përmes postës në adresën: Komuna e Fushë Kosovës, 12000, Rr. Tahir Zemaj, Objekti i Komunës, Departamenti i DKRS-së.
Sqarim i rëndësishëm: Klubet dhe Individët të cilët nuk i kanë mbyllur projektet paraprake (nuk kanë dorëzuar dëshminë e realizimit të projektit dhe raportin financiar), nuk do të shqyrtohen fare nga Komisioni për Vlerësim.
