Në vigjilje të festës, fillimisht, delegacione nga komuna vendosën kurora lulesh te varrezat e dëshmorëve dhe ato të përbashkëta, pastaj festa vazhdoi me Koncertin Festiv që u mbajt në hollin e Shkollës së Mesme “Hivzi Sulejmani”. Për përcjelljen e këtij koncerti kishin ardhur një numër i madh i qytetarëve, të cilëve iu prezantua një program i larmishëm me këngë e valle, përgatitur enkas për këtë festë nga Ansambli ”Zëri i Kosovës” Fushë-Kosovë dhe nxënësit e shkollave të qytetit tonë.
Fjalën përshëndetëse e mbajti Nënkryetari i Komunës, z. Fadil Krasniqi, i cili pasi iu uroi të pranishmëve këtë përvjetor ndër të tjera tha: ‘Jemi mbledhur sot, këtu së bashku, për të festuar ditëlindjen e Kosovës, ditëlindjen e shtetit tonë, dhe unë dëshiroj që t’ju përcjell ju dhe çdo qytetari të Fushë-Kosovës, urimet më të përzemërta për përvjetorin e dhjetë të Kosovës’.
17 Shkurti i vitit 2008, është akti më madhështor i historisë së vendit tonë, është çasti më sublim i gjithë historisë së Kosovës, kjo datë madhore është kufiri kohor që ndan historinë e re të Kosovës nga e shkuara e saj tragjike.
Shpallja e pavarësisë së Kosovës është rezultat i punës, i angazhimit, i dijes dhe i luftës së pandërprerë të popullit të Kosovës për realizimin e së drejtës më themelore të secilit popull, lirisë dhe mëvetësisë së tij.
Duke ju uruar dhjetëvjetorin e pavarësisë së Republikës, ju ftoj që të punojmë së bashku, në mënyrë që komunën tonë të dashur – Fushë-Kosovën, ta zhvillojmë dhe përparojmë, ta bëjmë komunë të rendit e të ligjit, komunë të përgjegjshme e llogaridhënëse, në të cilën secili qytetar do të ndjehet njësoj i rëndësishëm dhe njësoj i çmuar.
Fushë-Kosova ka nevojë për secilin nga ne, prandaj t’i japim asaj gjithçka që kemi mundësi. Le të na bëhet moto e punës sonë thënia e njohur e presidentit amerikan Kenedi: “Mos pyet çfarë mund të bëjë vendi yt për ty, por pyet ç ’mund të bësh t’i për vendin tënd”.
Brezi ynë ia ka borxh këtë jo vetëm fëmijëve tanë, ardhmërisë së këtij vendi, por edhe brezave të mëhershëm, të cilët punuan dhe sakrifikuan shumë për lirinë dhe pavarësinë e Kosovës.
Le të punojmë, pra, me dashuri dhe besim se e ardhmja e Republikës së Kosovës dhe e qytetarëve të saj, në këtë rast pra edhe të Fushë-Kosovës, do të jetë më e ndritur dhe më e begatshme.
Le të punojmë me angazhim e përulësi, sepse të gjithë ne jemi të përkohshëm, ndërsa e përhershme është vetëm Republika e Kosovës, atdheu ynë i mrekullueshëm!
Data e 17 Shkurtit, 2008 do të mbetet përjetësisht në historinë e Kosovës si kurorë e përpjekjeve shekullore të popullit tonë për liri, pavarësi, demokraci dhe dinjitet njerëzor, tha mes tjerash Nënkryetari i Komunës z. Fadil Krasniqi.
Manifestimit solemn iu shtua edhe prezenca e drejtuesve të Shoqatës “Miqtë e Amerikës“ ku zotëri Agim Rexhepi, me simbolin e kësaj shoqate për bashkëpunim të shkëlqyeshëm në mes të kësaj shoqate dhe DKRS, e nderoi Drejtoreshën e Kulturës, Rinisë dhe Sportit, znj. Nurije Avdiu.
