I lindur me 07.04.1930 në Sllatinë të Madhe, Ali (Muharrem) Osmani si një i ri që ishte, shpejtë bëhet emër i njohur jo vetëm për fshatin e tij por për gjithë rrethin e tij ku jetonte e vepronte.
Pasi përgatitet për ta ushtruar profesionin prej teknikut-Infermierit të mjekësisë, Ali Osmani (e që të gjithë e thërrisnin Ali “Saniteti” ) vendoset në një kënd të shtëpisë së kulturës në Sllatinë, për të filluar punën e tij.
Ishte viti 1960 kur Aliu filloi punën si i vetmi teknik-Infermier i mjekësisë në fshatin e tij në Sllatinë e pastaj edhe për tetë fshatrat tjera për rreth. Për dhjetë vite në dhomën e tij të punës që e kishte në shtëpinë e kulturës, pa kurrfarë kushte, tekniku – Infermieri Ali Osmani ofroi punë e shërbime pa përtesë kurse që nga viti 1970 kur ndërtohet ambulanca në fshat, ai krijoi emër dhe mori një epitet të pa kontestueshëm si një nga teknikët-Infermierët më të zotët dhe më i respektueshmi në këtë trevë.
Infermieri Ali Osmani shquhej edhe për një tjetër të veçantë që kishte. Ai nuk ofronte shërbime vetëm në vendin e tij të punës dhe vetëm për banorët e fshatit të tij por me çantën e tij të mbushur plotë me barëra e me injeksione, në çdo kohë, ecte nëpër të gjitha fshatrat për rreth duke ju ofruar shërbime të sëmurëve. Ecte pa u ndalur; në borë, në shi e në vapë, me e pa transport – sepse nuk kishte kushte, ecte rrugëve me gurë e me baltë me të vetmin qëllim që t’u ofronte shërbime të sëmurëve, gjithnjë aty ku kërkohej.
Ali Osmani na la sot vetëm fizikisht ndërsa jeta dhe vepra e tij, do të mbahet mend gjatë duke u kujtuar si punëtor i pa lodhshëm, humanist, i afërt dhe shumë i dashur për të gjithë qytetarët e komunës së Fushë-Kosovës.
Zoti e mëshiroftë dhe qoftë i pa harruar kujtimi për teknikun-Infermier Ali Osmani!
