Një delegacion nga Oda e Afarizmit të Kosovës (OAK), i kryesuar nga Kryetari i Bordit, Skënder Krasniqi, vizitoi sot Komunën e Fushë-Kosovës ku u prit nga Kryetari i Komunës Burim Berisha dhe bashkëpunëtorët e tij. Pasi u dëshiroi mirëseardhje mysafirëve kryetari Berisha i njoftoi ata për rrjedhat e përgjithshme e në veçanti për veprimtaritë e bizneseve që operojnë në komunën tonë.
Z. Krasniqi pasi falënderoi për pritjen që iu bë tha se: ‘qëllimi i takimit të sotëm është gjetja e mundësive për të investuar në ngritjen e kapaciteteve për një infrastrukturë më të avancuar për bizneset që operojnë në fshatin Harilaç. Kërkesa e jonë është që të asfaltohen rrugët, kyçja në sistemin e ujit dhe kanalizimit si dhe furnizimi i rregullt me energji elektrike në këtë zonë pasi që dita ditës po zgjerohet me të madhe’.
Kryetari Berisha theksoi se këtë vit do të fillojë hartimi i një plani të përgjithshëm infrastrukturor dhe se vitin e ardhshëm këto kërkesa sigurisht se do të plotësohen. Jemi shumë të interesuar që bizneseve që gravitojnë në atë zonë por edhe në tërë Komunën e Fushë-Kosovës t’iu krijojmë kushte sa më të mira dhe sa më të lehta që ata të funksionojnë ashtu siç parashihen me standarde të operimit, tha gjatë takimit kryetari Berisha i cili premtoi se ky nuk do të jetë takimi i parë në mes tyre por që do të ketë bashkëpunime të tilla edhe në të ardhmen përmes formave të ndryshme të komunikimit.
Po ashtu, Kryetari Berisha nuk la pa përmendur edhe temën aktuale – rrezikun e hapësirës ku Ministria e Ambientit po tenton ndërtimin e një deponie në zonën e fshatit Harilaç për ruajtjen e materieve të rrezikshme, iniciativë kjo të cilën fuqishëm po e kundërshtojnë bizneset, qytetarët dhe institucioni i komunës, bashkë me asamblenë.
