Kryetari i komunës së Fushë-Kosovës, z.Burim Berisha u ka drejtuar qytetarëve të komunës një mesazh me rastin e “12 Qershorit – Ditës së Lirisë”.
“Qytetarë të komunës së Fushë-Kosovës: Po bëhen 21 vite nga dita kur me 12 qershor të vitit 1999, Kosova e në këtë rast edhe Fushë-Kosova doli e lirë, pas një periudhe të gjatë sundimi nga një okupatorë i egër.
Për këto 21 vite në komunën tonë, janë realizuar shumë projekte të vogla, të mesme dhe të mëdha, me një vlerë disa miliona që tashmë janë në shërbim të qytetarëve. Është puna dhe motivi ynë kryesorë për një zhvillim të të gjitha segmenteve në komunën e Fushë-Kosovës, andaj ishte formula e përpjekjeve tona 21 vjeçare për të arritur rezultate që nuk janë të pakta në komunën e Fushë-Kosovës edhe pse nuk do të ketë vend për vetëkënaqësi.
Duke shprehur respektin për të gjithë qytetarët e komunës së Fushë-Kosovës; më lejoni që në emrin tim, dhe të të gjitha institucioneve të komunës të shpreh zotimin se do të jemi në shërbim të plotë për ju bashkëqytetarë duke u përpjekë deri në fund për të përmbushë realizimin e të gjitha obligimeve që dalin nga ju, nga Kuvendi i Komunës dhe Institucionet Shtetërore të Republikës së Kosovës.
Pasi që këtë 12 Qershor po e shënojmë në kushte të pandemisë, më lejoni të ju uroj dhe të ju përgëzoj për gjithë atë që keni bërë dhe po bëni që bashkërisht të ndërtojmë idealin e atyre që na dhuruan këtë ditë të gëzuar, të lumtur dhe të shenjtë”.
Zoti i shpërbleftë të gjithë ata që sakrifikuan për Lirinë dhe Pavarësinë e Kosovës.
