Me një mbrëmje festive komuna e Fushë-Kosovës përmbylli vitin 2013 me realizim të një varg projektesh në shumë fusha me interes për qytetarët.
Në fjalën hyrëse kryetari i Komunës, Burim Berisha, fillimisht falënderoi të pranishmit dhe më pas tha se ky ishte një vit i begatshëm, angazhimi ynë dhe përkrahja e pa kursyer e qytetarëve bënë që sot të jemi një shembull i mirë i një qeverisje të suksesshme që është synim për një të ardhme edhe më të ndritshme.
Këtë vit epiteti i krijuesit i takoi piktorit Sabit Hykolli, i cili para pak ditëve ndërroi jetë. Janë rreth 70 vepra arti të talentit dhe piktori Sabit Hykolli, i cili la gjurmë në disa faza e forma të pikturimit, që nga krijimet murale e deri te ilustrimet artistike dhe kopertinat e librave, që pasqyrojnë mjeshtërinë dhe zotësinë e autorit.
Kur kishte përfunduar Akademinë e Arteve, profesor Rexhep Ferri, student i të cilit ishte Sabit Hykolli e cilësoi atë ’si portretistin më të rrallë dhe më të mprehtë të brezit të ri të krijuesve figurativ të Kosovës.
Plaketën postmortem për Sabit Hykollin, nga dr.Emin Kabashi e mori Krenari, djali i Sabitit.
Me rezultate në sport u renditën dhjetë sportistë të klubeve të ndryshme, kurse epiteti i sportistit të vitit i takoi Erendita Gërgurit, anëtare e klubit të Taekwondos në Fushë-Kosovë si dhe anëtare e reprezentacionit të Kosovës. Erendita mbanë vendin e parë në Kosovë në kategorinë deri në 57 kg që nga viti 2007, kurse në kampionatin Ballkanik në Mal të Zi është renditur e treta. Është licencuar nga Federata Botërore e Taekwondos si trajnere.
Në këtë eveniment morën pjesë edhe Besim Hasani kryetar i Komitetit Olimpik të Kosovës si dhe shumë mysafir nga federatat e sportit të Kosovës dhe intelektual e punëtorë sportiv.
