Më 22.01.2026 u mbajt mbledhja e parë e Kuvendit Komunal, në të cilën ishin të pranishëm kryetari i komunës Valon Prebreza, kryesuesi i Kuvendit, drejtorët e drejtorive komunale si dhe asambleistët.
Seanca filloi me shqyrtimin e rendit të ditës, ku shumica e pikave të propozuara u miratuan dhe kaluan për diskutim e disa të tjera me shumicë votash u shfuqizuan. Gjatë kësaj seance, të gjitha propozimet e paraqitura në rendin e ditës morën një lloj trajtimi dhe përgjigjeje për hapat e mëtejmë, duke u sqaruar procedurat dhe veprimet që do të ndërmerren në vazhdim nga institucionet komunale.
Po ashtu, gjatë kësaj seance u bë edhe emërimi i nënkryetarit të komunës nga radhët e komuniteteve Gëzim Gara, çka u vlerësua si një hap i rëndësishëm drejt përfshirjes dhe përfaqësimit të barabartë të të gjitha komuniteteve në institucionet lokale.
Ndër pikat e rendit të ditës, u përfshi edhe pika e pyetjeve dhe përgjigjeve, e cila u kërkua nga asambleistët. Kjo pikë u hodh në votim dhe u miratua për t’u përfshirë në rendin e ditës. Në kuadër të saj, asambleistët parashtruan një sërë pyetjesh dhe shqetësimesh, për të cilat patën mundësi të marrin përgjigje të drejtpërdrejta nga kryetari i komunës dhe drejtorët përkatës.
Shumica e pyetjeve dhe diskutimeve u fokusuan në tema me rëndësi të veçantë për qytetarët, si situata e krijuar nga vërshimet, arsimi, shërbimet shëndetësore, si dhe çështje të tjera të interesit publik.
Kryetari i komunës dhe drejtorët përgjegjës dhanë sqarime konkrete, duke theksuar angazhimin për adresimin e këtyre çështjeve dhe për marrjen e masave të nevojshme në të ardhmen.
Seanca u karakterizua nga diskutime konstruktive si dhe me interes publik duke shënuar një fillim të rregullt të punës së Kuvendit Komunal për këtë mandat.
