Një delegacion i zyrtarëve të lartë të KEDS-it i përbërë nga z.Avni Alidemaj – Këshilltar Ekzekutiv për Marrëdhënie Qeveritare dhe z.Rexhep Podvorica, Menaxher në Zyrën Ligjore të KEDS-it, u pritën nga kryetari dhe nënkryetari i komunës z.Burim Berisha dhe z.Fadil Krasniqi.
Mysafirët informuan udhëheqjen komunale për investimet e KEDS-it në komunën e Fushë Kosovës për vitin 2019-2020. Këto investime kapin vlerën prej 2.6 milion euro. Në kuadër të këtyre investimeve është ndërtuar një trafostacion prej 35 KV si dhe dalje 20 kilovatësh të reja me të cilat është arritur një furnizim edhe më stabil i qytetarëve të Fushë Kosovës.
Ndërtimi i stacionit 35 KV ka lindur si nevojë e rritjes së ngarkesës me qëllim që konsumatorët të kenë një furnizim stabil deri në ndërtimin e nënstacionit të ri 110 KV.
Edhe viti 2021 do të vazhdoj me investime në komunën e Fushë Kosovës në mënyrë që të gjithë konsumatorët të kenë energji kualitative dhe stabile.
Nga ana e tij kryetari Berisha falënderoi zyrtarët por edhe punëtorët e KEDS-it për punën dhe angazhimin e tyre që po e bëjnë për qytetarët e komunës së Fushë Kosovës.
