Të Dashur Nxënës:
Pas pushimeve të merituara ju po riktheheni në bankat shkollore për të filluar një vit të ri mësimorë, të etur për dituri dhe përvoja të reja.
Këtë vit shumë fëmijë të komunës së Fushë-Kosovës nisin mësimin në klasën e parë, nisin rrugëtimin e gjatë në botën e dijes dhe unë i uroj ata dhe prindërit e tyre, duke ju dëshiruar shumë suksese e lumturi. Po ashtu, duhet vlerësuar në piedestal punën dhe sakrificën e mësimdhënësve, të cilët edhe në kohën më të rëndë për Kosovën, gjatë okupimit të rëndë, mbajtën gjallë arsimin shqip. Dua të falënderoj edhe punën dhe përgatitjet e Drejtorisë Komunale për Arsim, si dhe stafin e drejtorëve dhe mësimdhënësve të shkollave të komunës për fillim sa më të mbarë të vitit shkollor 2014/2015. Në nismën e këtij viti të ri shkollor, urime, përkushtim të plotë dhe suksese në rrugën e shkollimit tuaj.
I juaji, Burim Berisha
