Kryetari i Komunës së Fushë-Kosovës, z.Burim Berisha, së bashku me znj.Vjollca Ternava Konjusha dhe drejtoreshën e Kulturës, Rinisë dhe Sportit, znj. Nurije Avdiu, priti në një takim fituesit e medaljeve nga turneu ndërkombëtarë i karatesë “Grand Prix Croatia”. Në këtë turne ndërkombëtar, si pjesë e Reprezentacionit të Kosovës, morën pjesë 9 karateistë nga komuna e Fushë-Kosovës të cilët u stolisën me medalje.
Nga turneu “Grand Prix Croatia” i cili u mbajt në Samaborë të Kroacisë, Qendresa Ibrahimi, karateiste e klubit të karatesë “Fushë Kosova” i solli Kosovës medaljen e artë dhe kupën e cila i ka munguar deri më tani Kosovës.
Qendresa zhvilloi gjithsej gjashtë luftëra deri në finale dhe stolisja e saj me medaljen e artë ishte e merituar.
Pjesë e takimit ishin edhe Valza Gashi – fituese e medaljes së art në turneun Ballkanik në Shkup, Redona Gashi, Qendrim Halimi, fitues të medaljes së bronztë, Njomza Osmani dhe Zanita Gashi, fituese të medaljes së artë në konkurrencë ekipore dhe Rinesa Osmani e Dea Gashi, fituese të medaljeve të bronzta po ashtu në konkurrencën ekipore pranë këtij turneu Ballkanik.
Për të gjitha këto rezultate, kryetarin Berisha e informoi selektori i reprezentacionit të karatesë të Kosovës, z. Isak Curri, i cili shtoi se së shpejti do të jemi pjesëmarrës në Kampionatin Evropian 2020. Nga Fushë-Kosova pjesëmarrës të këtij kampionati do të jenë karateistet Redona Gashi, Valza Gashi dhe Rinesa Osmani.
Kryetari Berisha iu dëshiroi suksese në garat e mëtejme, premtoi se do të vazhdojnë edhe më tutje mbështetjen financiare për klubin dhe për fituesit e medaljeve, si dhe përmirësimin e infrastrukturës sportive.
Në përfundim të takimit kryetari Berisha ndau dhurata për fituesen e medaljes së artë, Qendresa Ibrahimi, trajnerin e Reprezentacionit të Kosovës, z.Isak Curri dhe trajnerin e klubit të karatesë “Fushë-Kosova”, z. Granit Hykolli.
