Fillimisht delegacioni i lartë nga OSBE-ja u prit nga kryetari i Komunës z.Burim Berisha, i cili pasi informoi ata për rrjedhat e përgjithshme u ndal në projektin që po realizohet në Komunën e Fushë-Kosovës, ku punëtor të shërbimit civil, të komunitetit shqiptar dhe serb, janë duke ndjekur aftësimin dhe komunikimin në këto dy gjuhë.
Kryetari Berisha tha se ky projekt është i një rëndësie të veçantë, sepse tani përveç klimës së mirë që mbretëron në këtë Komunë është një mundësi më e mirë për të përvetësuar edhe komunikimin.
Znj. Astrid Thors ishte shumë e kënaqur për rrjedhën e këtij projekti dhe shtoi se ky nuk do të jetë projekti i fundit në këtë komunë, sepse duke parë rëndësinë dhe pritjet nga ky projekt ne mendojmë edhe për realizimin e projekteve tjera.
Duhet përmendur se këtë kurs të aftësimit në shkrim, lexim dhe në të shprehur, në komunë, po e përcjellin 45 shërbyes civil.
Mysafirët e lartë ishin prezent edhe në seancën e punës, e cila zhvillohej në sallën e Kuvendit të Komunës.
Znj. Thors shoqërohej edhe nga komisioneri për gjuhë z. Slavisa Mladenovic nga ana e ECMI –it (Qendra Evropiane për Çështje të Pakicave), Adrian Zeqiri, drejtor ekzekutiv i ECMI Kosovë, Andrea Najvirtova, menaxher i projektit (ECMI), dhe Nejla Ayvazi (Asistent i projektit).
