Komuna e Fushë Kosovës, në bashkëpunim me Këshillin e Bashkësisë Islame të Fushë Kosovës, si dhe me angazhimin e asambleistëve komunalë dhe qytetarëve vullnetmirë, ka shpërndarë 65 pako ushqimore dhe 728 bidonë me ujë të pijshëm për qytetarët në zonat e prekura nga reshjet e mëdha të shiut.
Këto ndihma janë shpërndarë në disa lokacione të qytetit dhe në fshatrat Graboc i Poshtëm, Pomozotin, Henc dhe Miradi e Epërme.
Për shkak të gjendjes së rënduar, ekipet komunale kanë qëndruar në teren gjatë këtyre ditëve, duke monitoruar nga afër situatën dhe duke ofruar ndihmë të drejtpërdrejtë, veçanërisht për qytetarët që kanë pasur vështirësi në lëvizje nga shtëpitë apo banesat e tyre.
Komuna e Fushë Kosovës falënderon të gjithë ata që po kontribuojnë në këtë angazhim të përbashkët humanitar, në shërbim të qytetarëve.
Njëkohësisht, apelojmë tek qytetarët që të shmangin zonat e përmbytura dhe të raportojnë çdo situatë që paraqet rrezik për sigurinë publike.
193 – Zjarrfikësit
192 – Policia
112 – Emergjencat
+383 49 797 518 – Drejtoria për Shërbime Publike
