Në sallën e Kuvendit të Komunës është hapur ‘Ekspozita për vlerësimin preliminar të tokës’, organizuar nga: Komuna e Fushë-Kosovës, Ministria e Financave dhe Agjencioni Tatimor Suedez.
Në kuadër të aktivitetit për lansimin e projektit “ProTax2” ka filluar ‘Ekspozita për vlerësimin preliminar të tokës’ edhe në Komunën e Fushë-Kosovës, ku janë prezantuar zonat e vlerësimit dhe nivelet e vlerave për kategoritë e tokave: rezidenciale, komerciale, industriale, bujqësore dhe pyjore.
Për herë të parë, përmes këtij projekti do të bëhet vlerësimi i tokës. Ekspozita e këtij projekti ka nisur nga sot (26.05.2017) dhe do të jetë e hapur gjatë një muaji në Zyrën e Tatimit në Pronë, Nr. 25, pra deri më datë 26.06.2017, të gjithë të interesuarit mund të vijnë në Komunë për të ditur vlerën preliminare të tokës së tyre.
Po ashtu, përmes kësaj ekspozite ju do të njoftoheni në lidhje me vlerën e parcelës suaj, por, gjithashtu mund të jepni komente, vërejtje rreth rezultateve preliminare të vlerësimit dhe nëse komentet apo vërejtjet tuaja do të jenë të argumentuara do të ndikojnë në ndryshimin e vlerësimit përfundimtar. Përveç tjerash, një prej arsyeve të vlerësimit të tokës është se toka do të tatimohet në të ardhmen. Ky projekt do të bëjë të mundur për Komunën e Fushë-Kosovës që të bëjë më shumë investime në përmirësimin e jetës së përditshme për qytetarët.
Për më shumë informata vizitojeni ekspozitën në komunën tonë e cila do të jetë e hapur për një muaj.
Stafi i komunës ju mirëpret!
