Komuna e Fushë-Kosovës në bashkëpunim me GIZ-in dhe GAC-in fillon implementimin e projektit “Kompostimi individual tek amvisëritë ku shërbimi jepet derë më derë”.
Hyrje
Përmes projektit Shërbime të Qëndrueshme Komunale (SHQK), GIZ-i mbështet komunat në përpjekjet e tyre për të bërë modernizimin e shërbimeve publike në fushën e menaxhimit të mbeturinave, në pajtueshmëri me mandatin e tyre ligjor, me qëllim të ngritjes së efikasitetit në ofrimin e shërbimeve dhe rritjen e mirëqenies së qytetarëve.
Mbeturinat organike paraqesin tri probleme kryesore mjedisore: ndotjen e ujërave nëntokësore dhe sipërfaqësore përmes rrjedhjeve, përhapjen e sëmundjeve ngjitëse nga mbeturinat e hapura dhe të pambuluara që hidhen në vendet e groposura të papërpunuara dhe emetimi i metanit i cili është një gaz kryesor serre i liruar për shkak të gjendjes anaerobe në deponi.
Përshkrimi i projektit
Ndarja e mbeturinave organike (barishte, gjethe, lëvore të frutave, perimeve etj.) nga totali i mbeturinave që gjenerohen. Komuna përmes këtij projekti synon të ulë në vijimësi sasinë e mbeturinave që shkojnë në deponi, të ulë kostot e transportit dhe të trajtimit përfundimtar të mbeturinave, si dhe të kontribuojë në këtë mënyrë në rritjen e jetëgjatësisë së përdorimit të deponisë. Njëherësh praktikimi i kompostimit sjell përfitime për përdoruesit për prodhimin e plehut organik të kualitetit të lartë.
Objektivat e projektit
- Zgjerimin e grumbullimit të ndarë të mbeturinave organike në 346 amvisëri;
- Të sigurojë infrastrukturë për kompostim shtëpiak përmes ofrimit të komposterit;
- Të sigurojë një mjedis të pastër që mbron shëndetin e qytetarëve dhe që inkurajojnë zhvillimin e ekonomisë;
- Promovimi i praktikave të mira në menaxhimin e mbeturinave duke zvogëluar sasinë e mbeturinave të deponuara në deponi;
- Vetëdijesimin e komunitetit mbi rëndësinë e kompostimit në shtëpi.
- Të forcojë zbatimin e ligjit dhe rregulloreve për menaxhimin e mbeturinave.
Rezultatet e projektit
- Zvogëlimi i sasisë totale të mbetjeve që shkojnë për kompostim;
- Profit ekonomik për përdoruesit e kompostimit përmes prodhimit të plehut organik;
- Edukim dhe vetëdijesim për trajtimin dhe menaxhimin e mbeturinës te qytetarët.
