Me një seancë solemne dhe një rend dite prej njëmbëdhjetë pikave, kanë përfunduar mandatin e tyre delegatët e kuvendit të Komunës së Fushë-Kosovës.
Në hapje të punimeve, nga kryesuesi i Kuvendit të Komunës, z.Jakup Tërnava, u lexua rendi i ditës, i cili më pas u aprovua nga delegatët e pranishëm. Pas diskutimeve, për disa nga pikat, delegatët me pak vërejtje dhe disa propozime miratuan të gjitha pikat që u hodhën për votim nga kryesuesi i seancës.
Në fund të mbledhjes shefat e Grupeve Parlamentare të partive politike përfaqësuese në Kuvend, dolën për herë të fundit në foltoren e Kuvendit për të shprehur falënderimet për të gjithë delegatët e Kuvendit dhe kryesuesin, për kontributin e tyre gjatë mandatit që kishin si dhe uruan të gjithë ata që janë në listat zgjedhore.
Përmbyllja e seancës u bë nga kryesuesi i Kuvendit të Komunës, z.Jakup Tërnava, i cili falënderoi shefat e Grupeve Parlamentare, delegatët e Kuvendit, kryetarin e Komunës, drejtorët e drejtorive, vëzhguesit e seancave, mediat, KFOR-in, OSBE-në përfaqësuesit e shoqërisë civile etj. Po ashtu z.Tërnava uroi që procesi i zgjedhjeve të kaloj sa më mirë, kurse të gjithë atyre që janë në listat zgjedhore iu dëshiroi suksese në garën për përfaqësim në legjislaturën e re.
