Komuna e Fushë-Kosovës së bashku me OSBE-në ka mbajtur një takim me qytetarë me temë QASJA në DREJTËSI.
Përveç shumë qytetarëve dhe përfaqësuesve nga shoqëria civile në këtë debat morën pjesë Kryesuesi I Kuvendit të Komunës z. Fadil Krasniqi si dhe përfaqësues nga zyra e Avokatit të Popullit, dhe OSBE.
Qëllimi i këtij takimi ishte informimi mbi organizatat dhe institucionet që mund të ofrojnë ndihmë ligjore dhe juridike në zgjidhjen e problemeve të ndryshme, si dhe mënyrën e qasjes ndaj këtyre institucioneve.
Në këtë debat u tha se secili banor i Kosovës gëzon të drejtën për mbrojtje të barabartë juridike dhe qasje të papenguar në drejtësi pa marrë parasysh etninë, gjuhën, gjininë fenë, gjendjen ekonomike dhe sociale, aftësinë e kufizuar, orientimin seksual apo çfarëdo statusi tjetër.
Panelistët thanë se për t’i ushtruar këto të drejta, mund të:
– Kërkoni Avokat,
– Kërkoni ndihmë juridike falas,
– Kërkoni ndihmën e mbrojtësit të viktimave,
– Përdorni gjuhën tuaj,
– Kërkoni qasje në informata.
Pas disa debateve dhe diskutimeve nga pjesëmarrësit dhe panelistët, u vlerësua se ky takim ishte i dobishëm dhe i domosdoshëm andaj pritet se të tilla takime të organizohen edhe në të ardhmen.
