Në Komunën e Fushë-Kosovës sikur në të gjithë Kosovën, fillimi dhe realizimi i mësimit në distancë (e-mësimi) në situatë të jashtëzakonshme me përhapjen e pandemisë së virusit Covid-19, ishte formë e paprovuar më parë, mirëpo arsimi dhe shkolla për komunën tonë është me rëndësi të veçantë, që nënkupton aktivizimin dhe mobilizimin e të gjithëve në funksion të plotësimit të misionit të shkollës.
Drejtoria e Arsimit në bashkëpunim me drejtorët e shkollave që kur ka filluar mësimi online me 23 mars 2020, në kuadër të kanaleve të RTK-1 dhe të RTK-4, i ka obliguar të gjithë mësuesit e klasave, kujdestarët e klasave dhe mësimdhënësit lëndorë që të kontaktojnë dhe të ju bëjnë thirrje në forma të ndryshme të gjithë nxënësve e prindërve të tyre që t’i inkurajojnë dhe mbështesin fëmijët e tyre në përcjelljen e e-mësimit.
Ndërkohë, të gjithë mësimdhënësit nëpërmjet platformave elektronike si Zoom, viber, chat, e-mail dhe të tjera kanë filluar të zhvillojnë aktivitete mësimore në distancë, duke realizuar, përmbajtje mësimore e detyra të caktuara sipas planeve mësimore, me ç ‘rast pjesa dërmuese e nxënësve (sipas raporteve të drejtorëve të shkollave) i është përgjigjur mësimit nga distanca dhe po tregohen tejet aktiv.
Mësimi është në vazhdim dhe po zhvillohet në të gjitha shkollat në nivel të kënaqshëm .
