Dje, më datën 14.09.2017 Komuna e Fushë-Kosovës ka nënshkruar Marrëveshje të Mirëkuptimit me Institucionin privat shëndetësor “Spitali Euromed“.
Qëllimi i kësaj Marrëveshje të Mirëkuptimit është ofrimi i një donacioni për qytetarët e Komunës së Fushë-Kosovës, nga ana e Spitalit “Euromed”, në vlerë prej 25,000.00€.
Ky donacion ofron falas kryerjen e shërbimit shëndetësor për 100 ekzaminime të rezonancës magnetike dhe 5 intervenime kirurgjike nga kirurgjia abdominale (Apendix, gurë në idhëz, herni, hemoroide dhe lukth) për qytetarët e Komunës së Fushë-Kosovës.
Njoftohen të gjithë qytetarët e Komunës së Fushë-Kosovës që kanë udhëzim nga mjeku specialist i fushës përkatëse, të cekur më lart, që të drejtohen në Qendrën Kryesore të Mjekësisë Familjare, ku do t’i marrin të gjitha udhëzimet e nevojshme për ta shfrytëzuar këtë mundësi.
Në rekrutimin e pacientëve përparësi do të kenë rastet me kushte të rënda ekonomiko-sociale, personat me aftësi të kufizuara dhe kategoritë e dala nga lufta.
