Ansambli i Këngëve dhe Valleve “Zëri Kosovës “, mori pjesë në Festivalin Ballkanik të Folklorit “JEHONA”, i cili për herë të parë u mbajt në Bujanoc.
Në këtë festival, përveç grupit nga Kosova, të pranishëm ishin edhe grupe tjera nga Maqedonia, Serbia, Lugina e Preshevës.
Ansambli i Këngëve dhe Valleve ,,Zëri I Kosovës ” ne këtë Festival u paraqit me këngë dhe valle të zgjedhura burimore tradicionale, te përgatitura nga koreografi prof. Dilaver Kryeziu.
“Vlen të theksohet se ky Festival, nisur nga deklarimet e organizatorëve, nga viti i ardhshëm do të mbahet në të gjitha Komunat e Luginës se Preshevës dhe synimi i tyre ishte që të zgjerohet edhe më tej me Ansamble dhe grupe të ndryshme nga i gjithë Ballkani”.
Ky festival bëri jehonë të madhe edhe në shumë media dhe portale informative pasi që për herë të parë Flamuri I Kosovës u shpalos karshi flamujve tjerë pjesëmarrës e në mesin e tyre edhe ai serb.
Nderi ishte edhe më i madh që ky flamur u bartë në defile edhe në qendër të qytetit nga Ansambli i Këngëve dhe Valleve “ Zëri I Kosovës” nga Fushë-Kosova.
Më poshtë mund të lexoni disa shkrime për këtë Festival.
“Serbia njeh Kosovën dhe kjo ka ndodhur në Festivalin Ballkanik të Foklorit “Jehona” që u mbajt këto ditë në Luginën e Preshevës ku në krah të flamurit serb ishte edhe flamuri i Kosovës. Këtë fakt e tregon edhe fotoja e mëposhtme e siguruar në Bujanovc ku sipas revistës së nderit duket qartë pas flamurit shqiptar dhe atij serb edhe ai kosovar. Në fakt Kosova nuk njihet ende zyrtarisht nga Serbia, por kjo foto mund të jetë pikënisja për një marrëdhënie të re midis dy popujve. Ndërkohë që në këtë festival morën pjesë edhe grupe folklorike nga Mali i Zi, Bosnje Hercegovina dhe Kroacia”.
“Në festivalin Ballkanik të Folklorit i cili këtë vit është mbajtur në Bujanoc kanë marrë pjesë edhe përfaqësues nga Kosova krahas shteteve të tjera të ballkanit, raporton “Zeri.info”.
Mirëpo, në bazë të fotografisë që ka arritur të siguroj “Zeri.info”, ajo që bie më shumë në sy është se si në Bujanoc, pranë Shtëpisë së Kulturës, përfaqësuesit e Kosovës në këtë festival kanë shpalosur flamurin e Kosovës pranë përfaqësuesve serbë.
Edhe pse në këtë foto shihen të gëzuar përfaqësuesit e Kosovës për zbulimin e flamurit, disa prej përfaqësuesve serbë, në bazë të shikimeve të tyre si duket një gjë e tillë nuk iu ka pëlqyer aspak”.
