Besnik Osmani
PËRMBLEDHJE E PËRGJITHSHME
Besnik Osmani është aktualisht nënkryetar i Komunës së Fushë Kosovës.
Paraprakisht ka shërbyer si Auditor i Përgjithshëm i Republikës së Kosovës për një mandat pesëvjeçar dhe Sekretar i Përgjithshëm në Ministrinë e Administrimit të Pushtetit Lokal për 12 vite. Para emërimit si Sekretar i Përgjithshëm ka shërbyer si Drejtor i Departamentit për Administratë Publike, Drejtor i Departamentit për Bashkëpunim Ekonomik Ndërkombëtar dhe Menaxher i Pagesave në Thesarin e Kosovës për 5 vite radhazi në Ministrinë e Financave si dhe një mandat ka shërbyer si anëtar i Bordit të Ndërmarrjes Publike “Ibër Lepenci”.
Paralelisht ka qenë i angazhuar në procesin edukativ-arsimor në Universitetin e Cambridge në Londër (ligjërues mysafir, 2014-2015), profesor në Kolegjin AAB (2013-2016), dhe në Shkollën e Mesme Ekonomike (1996-1999).
Po ashtu, ka punuar për më shumë se 2 vite në disa organizata ndërkombëtare si SIGMA, HELVETAS dhe USAID (2021-2023) si ekspert apo drejtues në fushën e administratës publike, financave publike dhe në fushën e vetëqeverisjes lokale.
Në formë të përmbledhur janë rreth 30 vite përvojë pune në sektorin publik në nivel nacional dhe në organizata ndërkombëtare prestigjioze, në role dhe përgjegjësi të ndryshme strategjike, menaxheriale, ekzekutive, këshilluese dhe monitoruese.
Është themelues i dy programeve te vetme në nivel vendi: Programin e Bashkëpunimit Ndërkufitar (BNK) që vepron në kuadër të kornizës rregullative të Bashkimit Evropian, dhe Sistemin e Matjes së Përformacës Komunale (SMPK).
Lider i njohur me më shumë se 20 vite përvojë në promovimin e reformave kombëtare, duke punuar së bashku me akterë të ndryshëm të qeverisë për të hartuar dhe zbatuar reformat e administratës publike, financave publike, prokurimit publik e qeverisjes lokale dhe përmirësimin e menaxhimit financiar dhe ofrimit më të mirë të shërbimeve për qytetarët.
Rezultatet themelore janë të lidhura me aftësi superiore koordinuese për të sjellë ndryshime inovative në Zyrën Kombëtare të Auditimit, duke përfshirë krijimin e një njësie të re kundër mashtrimit dhe korrupsionit, anëtarësimin fuqiplotë të Kosovës në INTOSAI (Organizata Botërore e Institucioneve Supreme të Auditimit) dhe EUROSAI (Organizata Evropiane e Institucioneve Supreme të Auditimit), aplikimin për herë të parë të auditimeve të IT-së dhe auditimeve të pajtueshmërisë (136 auditime) në sektorët kritik dhe kompleks si energjia, mjedisi, telekomunikacioni, menaxhimi i mbetjeve e bujqësia dhe rritjen e numrit të projekteve të auditimit financiar nga 445 në 461 gjatë mandatit të tij.
Gjatë kësaj periudhe për herë të parë dhe në të vetmin institucion janë digjitalizuar proceset e punës duke u zhvilluar dhe zbatuar sistemi E-auditimi (auditim pa letër).
Këto rezultate kanë ndikuar që Zyra Kombëtare e Auditimit të renditet nga Banka Botërore në grupin e dytë më të mirë të institucioneve supreme të auditimit në botë, duke u ngjitur me shpejtësi në ranglistën botërore për integritet, transparencë, profesionalizëm dhe përgjegjshmëri.
Më parë në pozicionin e Sekretarit të Përgjithshëm (i rizgjedhur për 4 mandate rresht), ka udhëhequr reformën më të rëndësishme dhe komplekse për vetëqeverisjen 2005 – 2012.
Gjatë kësaj periudhe kohore janë dizajnuar dhe zbatuar reformat më të thella në sistemin e qeverisjes duke hartuar dhe zbatuar legjislacionin (hartimi i grupit të ligjeve për organizimin e vetëqeverisjes lokale), territoriale (përcaktimi i kufijve administrativ të komunave) funksionale (ndarja e pushtetit ndërmjet autoriteteve qendrore dhe lokale, kompetencave vetanake, të deleguara, dhe të zgjeruara), demokratike (duke prezantuar për herë të parë, kryetarin e zgjedhur të drejtpërdrejtë nga qytetarët dhe lista e hapur për anëtarët e kuvendeve komunale), fiskale (përcaktimi i të hyrave vetanake komunale dhe krijimi i tri granteve ndërqeveritare për komunat: granti administrativ, arsimit dhe shëndetësisë).
Si pjesë e kësaj reforme, ka luajtur një rol të rëndësishëm në ngritjen e një sistemi për monitorimin e ligjshmërisë së akteve komunale dhe sistemin e monitorimit të performancës së ofrimit të shërbimeve për qytetarët.
Në përvojën e tij ka shërbyer në organe dhe trupa të ndryshme profesionale e drejtuese si: Anëtar i Bordit Drejtues për regjistrimin e popullsisë dhe ekonomive familjare (2009-2011), Udhëheqës i Strukturave Operacionale për Bashkëpunim Ndërkufitar (2009 – 2016), Nënkryetar i Bordit për ri-integrim dhe ri-atdhesimin e personave (2010-2014), Kryetar i Komitetit Kombëtar për Decentralizim (2008 – 2012), Anëtar i Bordit për Reformën në Administratën Publike (2008 – 2014), Ekspert i Këshillit Evropian për çështjet e minoriteteve (2001-2004), Anëtar i Këshillit Ndërministror për Emërime të Pozitave të Larta (2010-2013), Anëtar i Grupit Punues për Reformën e Kontrollit Financiar (2013-2015), etj.
AKTIVITETI POLITIK
Para angazhimit në Thesarin e Kosovës (1999), që nga vitit 1989 për 10 vite rresht ka shërbyer si nënkryetar i Kryesisë Qendrore të Forumit të Rinisë së Lidhjes Demokratike të Kosovës (FR i LDK-së). Në vitin 2023 është rikthyer ne aktivitetin politik duke u zgjedhur kryetar i degës së LDK-së së Fushë Kosovës dhe anëtar i Kryesisë Qendrore të Lidhjes Demokratike të Kosovës (LDK).
PËRGADITJA SHKOLLORE
Besnik Osmani ka kryer studimet universitare në Fakultetin Ekonomik, në Universitetin e Prishtinës studimet e magjistraturës (Magjistër i shkencave) në Politikat Publike në Institutin për Teknologji Rochester (RIT) dhe Universiteti Amerikan (AUK) si bursist i Departamentit të Shtetit (SHBA) dhe aktualisht vazhdon studimet e doktoratës (PhD) për Administratë Publike në Fakultetin për Studime Evropiane dhe Qeverisje në Lubjanë të Sllovenisë.
Ka ndjekur me sukses disa programe ndërkombëtare të certifikimit dhe ka marr pjesë në programe studimore të specializimit: Akademia për Administratë Publike në Greqi, Specialist i Administratës Publike (2006), Instituti i Vjenës për Administratë Publike, Trajner i Certifikuar për Burime Njerëzore (2005), Shkolla e Gjuhëve të Huaja – Oxfort College, Angli (2004), Shkolla Politike e Këshillit të Evropës, Strasburg, Francë (2006), Programin e studimeve të Departamentit të Shtetit Amerikan – Shteti dhe Qeverisja Lokale në Washington, SHBA (2008), Menaxhimi i borxhit publik, Fondi Monetar Ndërkombëtar, Vjenë, Austri (2004), Planifikimi i Buxhetit – Akademia Federale Gjermane për Administratë Publike, Berlin, Gjermani (2002), Menaxhimi i qytetit, Kanada (2008), etj.
Flet gjuhën shqipe, serbe dhe angleze.
