Kryetari i Komunës së Fushë Kosovës, z. Burim Berisha, priti në zyrën e tij z. Muharrem Salihu, përfaqësues i komunitetit shqiptar nga Medvegja dhe president i organizatës humanitare AFEDS, e cila angazhohet në mbrojtjen e të drejtave elementare të njeriut. Kjo organizatë ka si mision adresimin e shkeljeve sistematike të të drejtave të shqiptarëve në Luginën e Medvegjës , Bujanovcit dhe Preshevës, veçanërisht përmes denoncimit të represionit administrativ dhe pasivizimit të adresave nga autoritetet serbe.
Z. Salihu, një afarist i suksesshëm dhe pronar i 12 restoranteve dhe hoteleve në qytetin e Venecias në Itali, është gjithashtu kandidat për deputet në Parlamentin Evropian në zgjedhjet e vitit 2024, i kandiduar nga shteti i Italisë.
Vizita e tij në Fushë Kosovë kishte për qëllim shprehjen e mirënjohjes ndaj Kryetarit z. Burim Berisha dhe institucionit komunal për përkrahjen e vazhdueshme ndaj komunitetit shqiptar të zhvendosur nga Lugina e Preshevës, Medvegjës dhe Bujanocit, të cilët prej pasluftës kanë gjetur strehë dhe mbështetje në këtë komunë.
Të dyja palët u dakorduan për intensifikimin e bashkëpunimit dhe përkrahjes institucionale në të ardhmen, me qëllim të fuqizimit të pozitës së këtij komuniteti dhe mbrojtjes së të drejtave të tyre themelore.
