Të dashur mësimdhënës,
Me rastin e festës suaj, kam nderin dhe kënaqësinë që t’ju përshëndes dhe t’ju uroj këtë festë të madhe, 7 Marsin – Ditën e Mësuesit.
Kur përkujtojmë këtë ditë të veçantë për arsimin shqip, ngjallim nderimin dhe respektin për të gjithë ata pishtarë të dijes dhe të diturisë, të cilët që nga kohërat e hershme hapen shkollat shqipe dhe me punën e tyre sublime ruajtën frymën kombëtare të arsimit shqip në Kosovë.
Rruga historike e shkollës shqipe është rrugë e sakrificës së madhe e të gjithë pishtarëve të dijes, e që shumë prej tyre edhe kanë rënë në rrugën e shkronjave shqipe, duke e ngritur nga një altar në shërbim të popullit dhe të atdheut, me punën e tyre sublime ruajtën frymën kombëtare të arsimit shqip.
Tash në Kosovën e lirë dhe të pavarur arsimi po jep kontribut të çmueshëm në edukimin dhe arsimimin e gjeneratave të reja. Në Komunën e Fushë-Kosovës, gjendja në arsim çdo ditë e më tepër po ecën drejt prosperitetit dhe avancimit.
Si institucione komunale do të angazhohemi dhe arsimit do t’i japim prioritet të merituar për përmirësimin edhe të mëtutjeshme të pozitës së kësaj kategorie që të jenë korrekte dhe të sinqerta, me synimin që arsimit gjithsesi do t’i kthehet dinjiteti dhe autoriteti që duhet ta ketë. Kjo edhe është e domosdoshme për rolin që ka arsimtari në edukimin dhe arsimimin e gjeneratave të reja.
Prandaj, mësimdhënës të nderuar, duke ju uruar edhe një herë 7 Marsin, Ditën Tuaj, Ditën e gjithë neve, suksese në misionin tuaj të shenjtë.
GËZUAR!
