Në skenën e hapur para ndërtesës së Komunës në mënyrë solemne u shënua 100 vjetori i pavarësisë së Shqipërisë.
Duke iu drejtua të pranishmëve Kryesuesi i Kuvendit Komunal, z.Jakup Ternava, tha se jemi mbledhur këtu për nder të 28 Nëntorit, festës së flamurit kombëtar dhe 100 vjetorit të pavarësisë së atdheut tonë, Shqipërisë. Sot, kur ne festojmë të lirë dhe me shumë krenari këtë festë të madhe të kombit s’ka sesi të mos e kujtojmë sakrificën e dëshmuar ndër gjenerata të të rënëve për liri , të veprimtarëve të shquar të lëvizjes sonë kombëtare dhe të gjithë atyre që kontribuuan në përmbushjen e aspiratave tona. Sot, kur festojmë 100 vjetorin e pavarësisë se shtetit amë, s’ka sesi të mos na kujtohen me shumë krenari veprimtarët e mëdhenj të idesë për pavarësi, të artikuluar fuqishëm që nga koha e Skëndërbeut, Ismail Qemajlit por dhe të atyre që me sakrificën e pafundme bënë të mundur që edhe pjesa tjerët e territorit shqiptar, Kosova, të fitojë lirinë dhe pavarësinë e saj, e që udhëhiqeshin nga Ibrahim Rugova dhe Adem Jashari. Veprat e tyre të mëdha dhe të pashembullta na bëjnë të ndihemi krenar për përkatësinë kombëtare që kemi, por dhe të krenohemi që ishim bashkëkohanik të këtyre figurave që bënë historinë e fundit. Do t’i kujtojmë me shumë nder dhe krenari dy shqiptarët më të mëdhenj të fund-shekullit 20 , Ibrahim Rugovën dhe Adem Jasharin, për dashurinë e madhe që kishin për atdheun dhe për largpamësinë në veprimet e secilit prej tyre në shërbim të atdheut.
Prandaj, në këtë 100 vjetor të pavarësimit të shtetit tonë amë, ne shprehim përkushtimin tonë për të ndërtuar sa më mirë shtetin tonë të ri . Jemi të vetëdijshëm për rrjedhat historike të bëra në kurriz të shqiptarëve , por besojmë fuqishëm se zhvillimi i të dy shteteve shqiptare në Ballkan, Kosovës dhe Shqipërisë, do të ishte zgjidhja më e mirë për shqiptarët.
Dhe kontributi për këtë mund të vijë nga çdokush. Prandaj, ne si Komunë e Fushë-Kosovës me në krye kryetarin e Komunës , z. Burim Berisha, jemi të përkushtuar të japim kontributin tonë në zhvillimin e qëndrueshëm dhe të suksesshëm të komunës sonë. Besojmë që investimi në të rinjtë është investimi më i qëndrueshëm dhe më i sigurt drejtë të ardhmes së vendit, por duke mos anashkaluar asnjëherë as gjeneratat tjera. Prandaj, gjatë këtyre viteve të udhëheqjes dhe menaxhimit me komunën e Fushë-Kosovës, ne kemi investuar në arsim dhe shëndetësi, në kulturë dhe sport, bujqësi, zhvillim ekonomik, infrastrukturë, ndërtim parqesh dhe në shumë e shumë projekte tjera. Dhe këtë jemi të përkushtuar ta vazhdojmë edhe më tej. Jemi të bindur se ëndrra e secilit prej nesh për një lokalitet me standarde evropiane do të bëhet shumë shpejtë e mundur. Këtë ua kemi borxh të rënëve, sepse ata flijuan jetën për një vend më të mirë. Ua kemi borxh të moshuarve sepse dhanë kontribut jetësor në shërbim të vendit. Ua kemi borxh gjeneratës së mesme sepse me shumë mund po e ndërtojnë së bashku me ne shtetin tonë të ri. Dhe në fund, ua kemi borxh të rinjve dhe fëmijëve sepse do jenë ata që do jetojnë më gjatë se ne në këto vende.
Dhe jemi të përkushtuar ta bëjmë, për këtë besoj kemi dhënë dëshmitë e mjaftueshme nga e kaluara e secilit prej nesh.
Ansambli i këngëve dhe i Valleve “Zëri i Kosovës” shfaqi një program të pasur kulturo-argëtues ku përveç valleve të zgjedhura në mënyrë shumë të veçantë u prezantuan edhe këngëtar dhe artist të komunës.
Një veçanti ishte edhe ekspozita e organizuar nga nxënës të shkollës fillore “Selman Riza” si dhe prezantimi i produkteve të kompanive “Bylmeti” dhe “Eurolona”
Në fund të këtij manifestimi kryetari i Komunës z.Burim Berisha preu tortën e Pavarësisë që kishin sjellë pastiqeritë “Kaltrina” dhe “Mabela”.
