Në komunën e Fushë-Kosovës është kontraktuar kompania fituese e cila do të kryej hartimin e Hartave Zonale në tërë territorin e Komunës.
Objektivi dhe Qëllimi i këtij projekti madhor:
Hartimi i një dokumenti multisektorial që përmes grafikoneve, fotografive, hartave dhe tekstit përcakton hollësisht llojin, destinimin, shfrytëzimin e planifikuar të hapësirës si dhe masat e veprimit të cilat bazohen në kohëzgjatje dhe projeksione të arritshme për investime publike dhe private për tërë territorin e komunës së Fushë-Kosovës.
Hartat zonale synojnë zhvillimin ekonomik, zhvillimin e zonave bujqësore, organizimin dhe planifikimin e hapësirave për ushtrimin e aktiviteteve komerciale, industriale, teknologjike dhe për shfrytëzim të përzier. Po ashtu, hartat zonale do të bëjnë përmirësimin e infrastrukturës teknike dhe hapësirave publike, përmirësimin e sigurisë publike, do të ndikojnë në mbrojtjen nga fatkeqësitë natyrore, mbrojtjen nga ndotja dhe nga degradimi i mjedisit, zhvillimin e turizmit dhe mbrojtjen e trashëgimisë kulturore.
Mbikëqyrës dhe bartës i procesit do të jetë drejtoria e Planifikimit Urban. Plani dinamik i punëve është 350 ditë.
Drejtoria e Planifikimit Urban në bashkëpunim me kompaninë fituese do të organizojë debat dhe konsultime publike me qytetarët për këtë projekt, me qëllim që të inkurajojë pjesëmarrje të gjerë të qytetarëve dhe konsultime transparente me publikun, duke mundësuar përfshirjen e vlerësimeve publike sa u përket ndikimeve të mundshme sociale ekonomike dhe mjedisore.
Për debatet publike qytetarët do të lajmërohen përmes njoftimit publik.
