Rreth tetë mijë nxënës të shkollave fillore dhe të mesme të Komunës së Fushë-Kosovës, duke përfshirë edhe mbi shtatëqind fëmijë që sot për herë të parë ulen në bankat shkollore, në të gjitha institucionet arsimore kanë filluar të hënën vitin e ri shkollor 2012/2013.
Që me fillimin e nismës së procesit mësimor, kryetari i Komunës Burim Berisha ka uruar të gjithë nxënësit dhe personelin për një vit të mbarë dhe të suksesshëm. “Të investosh në arsim do të thotë të investosh në të ardhmen e fëmijëve tanë, në të ardhmen e shtetit tonë andaj obligim yni mbetet përkushtimi dhe mbështetja maksimale në të gjitha institucionet, që nga ato më të ulëtat, në kopsht, në parashkollorë e deri tek nivelet më të larta akademike” ka thënë kryetari Berisha në një prononcim në fillim të ditës së parë të shkollës.
Sipas Drejtorisë Komunale për Arsim janë bërë të gjitha përgatitjet e duhura për një proces mësimor jo vetëm në suaza normale por edhe me investime në infrastrukturë që të mundësohet një proces sa më i avancuar.
Për një mbështetje të duhur dhe të nevojshme është shprehur edhe Islam Shabani, drejtor i Drejtorisë për Arsim në Komunën e Fushë-Kosovës, i cili më tej tha se sot për herë të parë shkolla e mesme Gjimnazi “Hivzi Sulejmani” fillon punën në objekt të ri modern të pajisur me gjithë infrastrukturën dhe kabinetet.
