KKSB në Fushë-Kosovë mbajti mbledhjen e rregullt ku u diskutuan shumë pika që kishin të bënin me gjendjen e përgjithshme të sigurisë në këtë komunë.
Kryesuesi i KKSB-së, Burim Berisha, pasi informoi të pranishmit për rendin e ditës ngriti për diskutim çështjen e qëndrimit të bashkatdhetarëve tanë në vendlindje, duke shtuar se qëndrimi i tyre këtu kërkon një vëmendje më të madhe të të gjithë neve, sepse është një fluks shumë i madh i atyre që po qëndrojnë këto ditë këtu duke ndryshuar pak a shumë gjendjen e përgjithshme në komunë.
Qerim Gara anëtar i KKSB-së si dhe prifti Nikola Dragicevic ngritën për diskutim çështjen e kalimit të kufirit në vendkalimin në Merdare duke e cilësuar atë si një problem të kahershëm, i cili i shqetëson gjithë qytetarët e Kosovës.
Edhe komandantja e stacionit të Policisë në Fushë-Kosovë, Vjollca Hoti, informoi të pranishmit për sigurinë e përgjithshme duke ofruar ato edhe me shifra dhe përqindje për të gjitha rastet që ka evidentuar policia.
Në këtë takim u diskutuan edhe disa tema tjera, siç ishin ato për dukurinë e zjarreve ku u tha se këtë vit është më mirë se asnjë herë më parë por kërkohet një vigjilencë më e madhe. Çështja e rrugëve ishte po ashtu tema që u trajtua më së shumti ku të gjithë të pranishmit shprehën shqetësimet e tyre për ketë kaos në rrugët e Fushë-Kosovës, kurse kryetari Berisha informoi edhe për shkresat që i ka drejtuar Ministrisë së Infrastrukturës. Nënkalimi në hyrje të Fushë-Kosovës u përmend si një problem më vete, sepse ai nuk i plotëson standardet e një nënkalimi ku parashihet që aty të kalojnë automjete dhe mekanizëm bujqësor pastaj shumë nxënës e qytetarë.
