Në zbatim të Planit të Veprimit për rritjen e mbulueshmërisë me vaksinën MMR dhe parandalimin e përhapjes së fruthit, ekipet e QKMF-së kanë kontaktuar qindra prindër, kanë zhvilluar vizita në terren, kanë ofruar këshillim shëndetësor dhe për 2 javë kanë vaksinuar 299 fëmijë të moshës 0–5 vjeç.
Vetëm me vaksinën MMR janë vaksinuar 174 fëmijë në Fushë Kosovë. Sipas të dhënave të raportuara nga IKSHPK-ja, nga rreth 300 fëmijë të vaksinuar me vaksinën MMR në nivel vendi gjatë kësaj periudhe, afërsisht 58% janë vaksinuar në komunën tonë.
Ky rezultat është dëshmi se një plan i mirë, kur shoqërohet me punë në terren, përgjegjësi dhe përkushtim profesional, jep rezultate konkrete.
Mirënjohje të veçantë për Njësinë e Vaksinimit, ekipet e QKMF-së dhe të gjithë profesionistët shëndetësorë për punën, angazhimin dhe kujdesin e treguar.
Falënderojmë prindërit për bashkëpunimin dhe përgjegjësinë e treguar, duke i ftuar që edhe më tej të vazhdojnë me vaksinimin e fëmijëve sipas kalendarit të rregullt. Vetëm së bashku mund t’i mbrojmë fëmijët tanë dhe gjithë komunitetin.
