Kryetari i Komunës së Fushë Kosovës, Valon Prebreza, së bashku me Nënkryetarin për Komunitete, Gëzim Gara, dhe Drejtoreshën e Shëndetësisë dhe Mirëqenies Sociale, Albana Gashi, kanë pritur në një takim zyrtar përfaqësues të UNICEF-it.
Takimi u fokusua në diskutimin e mundësive për bashkëpunim të ndërsjellë në kuadër të programeve të UNICEF-it, me theks të veçantë në promovimin dhe mbrojtjen e të drejtave të fëmijëve, përmirësimin e shërbimeve shëndetësore, parandalimin e braktisjes së shkollës, forcimin e imunizimit si dhe zhvillimin e edukimit të hershëm.
Me këtë rast, Kryetari Prebreza theksoi rëndësinë e bashkëpunimit institucional me organizata ndërkombëtare si UNICEF-i, duke shprehur gatishmërinë e Komunës për realizimin e projekteve konkrete që kontribuojnë drejtpërdrejt në rritjen e mirëqenies dhe zhvillimit të fëmijëve në Fushë Kosovë.
