OJQ “Multiethnic Culture of Kosovo” pati kënaqësinë të organizojë një takim të veçantë në kuadër të Javës së Kulturës Rome, të mbajtur më 20 maj 2025, në Asamblenë Komunale të Fushë Kosovës. Ky aktivitet synon të rrisë ndërgjegjësimin publik, të promovojë diversitetin kulturor dhe të përmirësojë përfaqësimin e komunitetit rom përmes kulturës, sportit, artit, edukimit dhe dialogut ndëretnik.
Gjatë takimit, u prezantuan të arriturat për komunitetet rom, ashkali dhe egjiptian për periudhën 2023–2025, ndërsa pjesëmarrësit patën mundësi të diskutojnë për sfidat dhe hapat e ardhshëm drejt përfshirjes së barabartë në shoqëri.
Deputeti Albert Kinolli, në emër të OJQ-së “Multiethnic Culture of Kosovo”, ndau mirënjohje për kontributin dhe mbështetjen e dhënë ndaj komunitetit rom gjatë viteve 2024–2025. Çmimet e mirënjohjes iu dorëzuan:
Kryetarit të Komunës, z. Burim Berisha
Nënkryetarit z. Besnik Osmani
Drejtorëve komunalë dhe zyrave përgjegjëse që kanë kontribuar në fuqizimin e komunitetit rom
Në kuadër të vizitës, deputeti Kinolli zhvilloi një takim me Kryetarin Berisha dhe Nënkryetarin Osmani. Ata e informuan deputetin për planet dhe investimet komunale në mbështetje të komunitetit rom dhe komuniteteve tjera. U theksua se Komuna e Fushë Kosovës është e hapur dhe e barabartë për të gjithë qytetarët, duke ofruar mbështetje të vazhdueshme përmes investimeve në:
Ujësjellës dhe infrastrukturë rrugore (asfaltime)
Projekte kulturore, edukative dhe shëndetësore
Ndihma humanitare për familjet në nevojë
Kryetari Berisha dhe Nënkryetari Osmani rikonfirmuan përkushtimin institucional për të garantuar një përfshirje aktive dhe të barabartë të komuniteteve rom, ashkali dhe egjiptian në jetën publike dhe institucionale të komunës.
OJQ “Multiethnic Culture of Kosovo” falënderon të gjithë pjesëmarrësit dhe bashkëpunëtorët për përkrahjen dhe angazhimin e tyre në këtë mision të përbashkët për një shoqëri më të drejtë, gjithëpërfshirëse dhe me vlera të mirëfillta demokratike.
