Është zhvillua mbledhja e radhës e Këshillit Komunal për Siguri në Bashkësi (KKSB) në Fushë Kosovë, nën drejtimin e Kryetarit të Komunës, z. Burim Berisha, i cili njëkohësisht është edhe Kryesues i këtij këshilli.
Takimi u mbajt me pjesëmarrjen e anëtarëve të KKSB-së dhe përfaqësuesve të institucioneve relevante si Forca e Sigurisë së Kosovës (FSK), Ministria e Punëve të Brendshme (MPB), KFOR-i, Policia e Kosovës dhe përfaqësues të tjerë.
Rendi i ditës përfshinte pikat kryesore.
Në pikën e parë, u dha një informatë për gjendjen e sigurisë në komunën e Fushë Kosovës nga Komandanti i Stacionit Policor, z. Bekim Zogjani. Ai prezantoi një raport mbi situatën aktuale të sigurisë, duke theksuar se gjendja është e qëndrueshme, stabile dhe pa ndonjë tendencë për ndonjë përkeqësim eventual por gjithsesi kërkohet vëmendje e vazhdueshme.
Pika e dytë përfshinte informata të përgjithshme nga Drejtoria e Arsimit, Drejtoria e Shërbimeve Publike dhe ajo e Infrastrukturës. Drejtorët përkatës raportuan për aktivitetet dhe projektet në zhvillim, sfidat e hasura dhe planet për përmirësimin e shërbimeve për qytetarët.
Gjatë diskutimeve, u ngrit edhe shqetësimi për problemin në rritje me qentë endacak, që po paraqet rrezik për sigurinë e qytetarëve. U kërkua që institucionet përkatëse të ndërmarrin masa konkrete për menaxhimin e këtij problemi.
Kryetari Berisha falënderoi pjesëmarrësit për bashkëpunimin dhe theksoi rëndësinë e takimeve të tilla për forcimin e sigurisë dhe mirëqenies në komunë. Ai gjithashtu theksoi angazhimin e komunës për të adresuar shqetësimet e ngritura dhe për të bashkëpunuar ngushtë me të gjitha institucionet relevante.
